అమితాబ్ దాదాపు నన్ను చంపినంత పని చేశారు: మనోజ్ బాజ్‌పేయి

ప్రముఖ నటుడు మనోజ్ బాజ్‌పేయి, బాలీవుడ్ మెగాస్టార్ అమితాబ్ బచ్చన్‌కు సంబంధించిన ఒక సరదా అనుభవాన్ని పంచుకుని అందరినీ నవ్వించారు. తాను నటించిన 'ది ఫ్యామిలీ మ్యాన్ 3' వెబ్ సిరీస్ ప్రమోషన్ల కోసం సహ నటుడు జైదీప్ అహ్లావత్‌తో కలిసి ఆయన 'కౌన్ బనేగా కరోడ్‌పతి' (KBC) షోకు హాజరయ్యారు. ఓ సినిమా షూటింగ్ లో అమితాబ్ బచ్చన్ తన ప్రాణాల మీదకు ఎలా తెచ్చారో మనోజ్ వివరించారు. ఈ సంఘటన దాదాపు 26 ఏళ్ల క్రితం జరిగిందని చెబుతూ పాత జ్ఞాపకాల్లోకి వెళ్లారు.

మనోజ్ బాజ్‌పేయి మాట్లాడుతూ, "అమిత్ జీ ఒకసారి నన్ను దాదాపు చంపేంత పని చేశారు. నాకు చిన్నప్పటి నుంచి వర్టిగో (ఎత్తైన ప్రదేశాలంటే తీవ్రమైన భయం) ఉంది. ఈ విషయం తెలిసి కూడా ఒక సినిమా షూటింగ్‌లో నన్ను ఇబ్బంది పెట్టారు" అని చెప్పడంతో అమితాబ్ సహా అందరూ ఆసక్తిగా వినడం ప్రారంభించారు.

ఆ ఘటనను వివరిస్తూ, "ఒక సినిమా షూటింగ్‌లో భాగంగా దాదాపు 150 నుంచి 200 అడుగుల ఎత్తులో ఉన్న జలపాతం పైనుంచి దూకాల్సిన స్టంట్ ఒకటి వచ్చింది. యాక్షన్ డైరెక్టర్, దర్శకుడు అందరూ వచ్చి నన్ను ఆ షాట్ చేయమని అడిగారు. సేఫ్టీ కోసం హార్నెస్ కడతామని కూడా చెప్పారు. కానీ 20 అడుగుల ఎత్తులో నిల్చోవడానికే వణికిపోయే నేను, 150 అడుగుల పైకి వెళ్లమంటే ఎలా ఒప్పుకుంటాను? నేను గట్టిగా నిరాకరించాను. పైకి వెళితే నాకు గుండెపోటు వస్తుంది, నేను చనిపోతాను అని చెప్పేశాను" అని మనోజ్ తెలిపారు.

సెట్‌లోని వారెవరూ తనను ఒప్పించలేకపోవడంతో, చివరికి అమితాబ్ బచ్చన్‌ను రంగంలోకి దించారని మనోజ్ గుర్తుచేసుకున్నారు. "అప్పుడు అమిత్ జీ నా దగ్గరికి వచ్చారు. ‘చూడు మనోజ్, నేనున్నాను కదా. మనం కేవలం 50 అడుగుల ఎత్తు వరకే వెళదాం. మనోజ్‌కు భయం కాబట్టి అంతకంటే పైకి తీసుకెళ్లడం ప్రమాదకరం అని నేను వాళ్లకు ముందే చెప్పాను. కిందకు చూడకు, సూటిగా చూడు’ అని ఎంతో నమ్మకంగా చెప్పారు. ఆయన మాటలతో నేను కాస్త ధైర్యం తెచ్చుకుని స్టంట్‌కు సిద్ధమయ్యాను" అని వివరించారు.

అయితే, అసలు కథ అప్పుడే మొదలైందని మనోజ్ తెలిపారు. "సేఫ్టీ హార్నెస్‌తో మమ్మల్ని పైకి లేపడం మొదలుపెట్టారు. కానీ, మేము 50 అడుగులు దాటి చాలా పైకి వెళుతున్నామని నాకు అర్థమైంది. భయంతో 'సర్! సర్! మనం 100 అడుగుల పైకి వెళుతున్నాం!' అని గట్టిగా అరిచాను. నా అరుపులు, భయం చూసి కూడా అమిత్ జీ ఎంతో ప్రశాంతంగా, 'వినండి... ఒకవేళ మనకు ఏమైనా జరిగితే, నేను జయను ఎంతగానో ప్రేమిస్తున్నానని ఆమెకు చెప్పండి' అని అన్నారు" అని మనోజ్ చెప్పడంతో సెట్‌లో ఉన్న అమితాబ్ బచ్చన్, జైదీప్ అహ్లావత్, ప్రేక్షకులు అందరూ ఒక్కసారిగా గట్టిగా నవ్వేశారు. ఈ సరదా సంఘటనతో కేబీసీ షోలో సందడి వాతావరణం నెలకొంది. 

మనోజ్ బాజ్‌పేయి నటించిన 'ది ఫ్యామిలీ మ్యాన్ 3' వెబ్ సిరీస్ నవంబర్ 21 నుంచి ప్రసారం కానుంది.